Duke marrë shkas nga rasti kur një vajzë lindi në tualentin e Urgjencës së QSUT-së, mjeku obstetër gjinekolog Rezart Ajazi ka folur për fenomenin që ndodh me vajzat dhe gratë. E reja është paraqitur në Urgjencë, pasi kishte dhimbje të forta barku dhe fryrje. Më pas vajza ka kërkuar të shkoj në tualet, aty ku edhe ka kryer lindjen e fëmijës së saj.
Në një reagim të dytë, Shoqata e Infermierëve bëri të ditur se 20-vjeçarja ka shtangur të gjithë stafin, pasi ka deklaruar se nuk ishte në dijeni të një shtatzënie. Mjeku ka analizuar këtë çështje, e madje dhe si arsyetohen për të mos treguar të vërtetën se ato së shpejti do të sjellin në jetë një fëmijë.
Mjeku Rezart Ajazi tha në ABC Live se shtatzënitë e fshehura njihen në literaturën mjekësore. “Shkencërisht barra e fshehtë njihet si diagnozë. Rastet e barrës kritike të fshehtë mbulohen me elemente që për ne përbëjnë atë që duhet diagnoza diferenciale.
Në shtatzëni nuk ka cikël menstrual për shembull. Pacientja mund të mendojë se ky çregullim i cilklit lidhet me faktorë të tjerë. Rritja e madhësisë së barkut argumentohet me patologji të tjera, që mund të çojnë në këtë fenomen, siç janë fryrja e zorrëve, probleme tumorale, etj.
Çregullimet e gjumit për shembull, apo lëvizjet fetale i interpretojnë si lëvizje zorrësh dhe e gjithë kjo që thashë më sipër, sjell atë që quhet shtatzëni e fshehtë”, tha ai.
Mjeku argumentoi më tej se eksperienca ka treguar edhe mjaft raste ku shtatzënitë janë mohuar nga vajzat për shkaqe sociale apo familjare.
“Kemi patur raste që kur kemi futur vajza apo gra për ekzaminim, na janë përgjëruar që të mos u tregojnë familjarëve për shtatzëninë”, tha Ajazi.
“Ne kemi protokoll të ndjekjes së shtatzënisë, duke patur në fokus mirëqenien e nënës dhe fëmijës. Duke mos u zbatuar protokolli përkatës, mundet që këto shtatzëni të kenë pasoja, siç është rasti që patëm QSUT ku vajza shkoi dhe lindi në tualetin e Urgjencës, ndërkohë që duhej të vinte te ne.
Shmangia nga protokolli, do të sjellë pasoja për këtë shtatzëni dhe askush më pas nuk garanton se si mund të shkojë ajo. Madje, edhe në rastet kur i ndjekim shtatzënitë që nga fillimi, na duhet ndonjëherë që të konsultohemi me kolegët tanë për raste të caktuara. Tani imagjino ç’mund të ndodhë për një shtatzëni të pandjekur”.
