Arrestohet pas një ndjekjeje si në filma një shqiptar i kërkuar si pjesë e një bande grabitësish që ishin bërë makth për shumë italiane.
Në pranga u vu shqiptari Simon Bushi, 28-vjecar. Ai ishte emër i njohur për drejtësinë pasi kishte qenë më parë i dënuar për krime kundër pasurisë, ndërkohe që ishte pjesë e një bande të specializuar grabitësish që numëron një seri të madhe vjedhjesh në Milano dhe Bergamo, raporton bergamonews.it.
Mbrëmë, i dyshuari u pikas nga patrulla e policisë, pas sinjalizimeve që kishin marrë se një makinë “Audi A4 SW “, me targa të huaja sillej vërdallë Bergamos, duket për të finalizuar grabitjen e radhës.
Policia iu vu nga pas, por shqiptari shpejtoi shpejtësinë dhe kështu nisi një gare ndjekje. Kur pa se nuk do ia dilte dot, shqiptari braktisi në një fushë makinën dhe ia mbathi vrapit, por nuk mundi të ecte shumë gjatë, pasi u prangos. Ai akuzohet tashmë edhe për dhunën ndaj karabinierëve, pasi nuk pranoi të dorëzohej qetësisht.
