Zvicra në Botëror është pjesë e grupit E, një nga grupet më të vështira ku favoriti për të marrë pikë të plota është Brazili. Por nuk është kjo ndeshja më e komentuar për zviceranët, por ajo me Serbinë. Helvetët kanë në organikë 4 lojtarë kosovarë dhe kjo ka bërë që të flitet shumë për këtë përballje duke e tensionuar situatën.
Por Xherdan Shaqiri, në një intervistë për mediat zvicerane ka folur si një profesionist i vërtetë. Ai është përpjekur të ulë tonet e ashpra për këtë takim duke e cilësuar si thjeshtë një ndeshje futbolli dhe se kjo nuk duhet të përfshiheshe nga emocione të tjera.
“Shumë mendojnë se do të ketë shumë politikë në këtë takim, për shkak të origjinës kosovare timen dhe të disa shokëve të tjerë të mi në ekip. Vërtet Serbia dhe Kosova luftuan, por ky është futboll dhe bëhet fjalë për një ndeshje futbolli, asgjë më shumë”, deklaroi ai.
Shaqiri flet edhe për përvojën në Premier League dhe gjendjen fizike. “Në Angli është një kampionat i lodhshëm dhe pa pushime dimërore. Ka qenë i lodhshëm edhe psikologjikisht, për shkak të luftës për mbijetesë”, deklaron lojtari i Stoke City.
