Me anë të një hashtagu “GOBACKVIÇ”, shqiptarët po protestojnë në rrjetet sociale, për të treguar se nuk e duan Goran Bregovic në Korçë.
“GO BACK VIÇ se nuk mund të na e marrësh për herë të dytë dinjitetin! Go Back Viç se kemi Mihallaq Andrean në Korçë që këndon serenata korçare dhe që ta kënaq shpirtin, go back viç se kemi korin Lira dhe plot artistë të tjerë që një grusht njerëzish i lënë në harresë!”, është teksti i shkruar mbi foton që ka shpërndarë Flori Mumajesi dhe që po bëhet virale.
Aartistë të shumtë, por edhe qytetarët kanë kërkuar që të bojkotohet festivali i Korçës, në të cilin do të jetë i ftuar këngëtari serb Goran Bregovic, që ka nxitur masakrat serbe ndaj shqiptarëve me këngët e tij. Pavarësisht ankesave dhe protestave në rrjetet sociale, Bashkia e Korçës nuk ka ndryshuar planin me koncertin. Nënkryetarja e Bashkisë, Benila Terova, është shprehur në një prononcim për “Gazetën Express” se kjo çështje është mbyllur dhe se Bregovic do të vijë në Shqipëri.
“Ne nuk e tërheqim pjesëmarrjen e Bregovic nga Festa e Birrës, sepse refuzojmë të pozicionohemi politikisht në këtë debat. Nuk ka asnjë qasje politike pjesëmarrja e një këngëtari lindur në Sarajevë, dhe që në njohurinë tonë para se ta kontaktonim për ta pasë pjesë dhe e kemi të saktë nuk ka pasur asnjë lloj pozicionimi as kundër shqiptarëve as kundër kosovarëve”, ka thënë ajo.
