Teksa vendi është përfshirë nga temperaturat nën zero, Ministria e Arsimit njoftoi se nga sot e deri të mërkurën do të jetë pushim shkollat në rang vendi. Shkollat do të qëndrojnë të mbyllura, për shkak të temperaturave që do të ulen deri në -17 gradë celsius.
Pas këtij vendimi, Ministrja e Arsimit, Evis Kushi, njofton se Qeveria ka vendosur që njëri nga prindërit me fëmijë të mitur, të mund të qëndrojë në shtëpi, për shkak të mbylljes së shkollave. Prindi që qëndron për t’u kujdesur për fëmijët, nuk do të ketë pasoja administrative apo financiare.
“INFORMIM PËR PRINDËRIT
Nisur nga vendimi i fundit për ndërprerjen e procesit mësimor nga data 24 – 26 janar për shkak të kushteve të vështira atmosferike, nisur edhe nga eksperiencat e mëparshme ku me vendim të Këshillit të Ministrave njëri nga prindërit me fëmijë të mitur lejohet të qëndrojë në shtëpi pa pasoja administrative dhe financiare, i njëjti vendim do të aplikohet përsëri edhe gjatë javës së ardhshme.
Ju uroj të dielë të qetë!
Java u mbyll me temperatura ekstreme që shkuan deri në minus 16 gradë. Ndonëse të parashikuara, ditët e acarit mbërthyen vendin, duke krijuar vështirësi në fshatra relativisht të thella, si dhe ndërprerjen e përkohshme të ujit dhe energjisë elektrike në disa zona.
