Edhe pse e gjithë Shqipëria është nën ujë, kryeministri Rama ka zgjedhur të mos dalë në terren për të parë atë që po ndodh dhe mbase për t’u siguruar qytetarëve ndihmën e nevojshme.
Teksa situata paraqitet problematike në shumicën e qarqeve në vend, Rama siguron mbështetje nëpërmjet një postimi në Facebook.
Sipas tij, kjo situatë po përballohet me angazhimin maksimal të të gjithë strukturave shtetërore, ndërsa shton se shteti është në këmbë dhe do të jetë për të përballuar situatën e për të garantuar sigurinë e jetës deri në normalizimin e plotë të situatës.
“Siç e paralajmëruam jemi në situatë të jashtëzakonshme nga rreshjet e dendura dhe papushim të dy ditëve të fundit. Kjo situatë po përballohet me angazhimin maksimal të të gjithë strukturave shtetërore, të cilat ishin në gatishmëri të plotë dhe prej mbrëmjes së djeshme janë në krye të detyrës duke ndihmuar qytetarët e familjet e prekura.
Gjatë natës janë shpëtuar nga përmbytjet dhe akomoduar në kushte të sigurta 315 persona. Gjatë ditës së sotme pritet rëndim i gjendjes, veçanërisht në pjesën jugore të vendit. Janë marre masa për menaxhimin e situatës në basenet e lumenjve Vjosë, Shkumbin dhe Seman ku priten edhe prurje të shtuara.
I gjithë shteti është në këmbë dhe do të jetë pranë jush, ditë e natë për të përballuar situatën e për të garantuar sigurinë e jetës deri në normalizimin e plotë të situatës.
Lutem bashkëpunim me Forcat e Armatosura, strukturat e emergjencave civile, bashkitë e prefekturat, në përpjekjet e tyre për sigurinë e jetës suaj në radhë të parë”, shkruan Rama në Facebook.
Por, ashtu si në postimin e mëngjesit, qytetarët janë mjaft të pakënaqur nga përballimi i kësaj situate në vend, gjë që e shprehin nëpërmjet komenteve të tyre kritikuese.
Teksa poston shkrimin në fjalë, Rama publikon edhe disa foto, në albumin e titulluar: “Shteti në krye të detyrës”.
Por, duket se Rama ka pritur një tjetër moment për të zbritur në terren e për të parë nga afër situatën alarmante. Rreth orësh 14:30 ai është shfaqur në Fier, ndërsa e ka nisur fjalën e tij para kamerave duke falendëruar Bashën.
