Shqipëria vijon të ketë një trend aspak frenues për ndërtimin e hidrocentraleve, aplikimet për ndërtimin e tyre kanë filluar edhe këtë vit. Në Ministrinë e Infrastrukturës dhe Energjisë është paraqitur një kërkesë për ndërtimin e dy HEC-ve të reja në qarkun e Lezhës-shkruan Tirana Today.
Shoqëria e cila merret me ndërtimin e HEC-ve, “Ulëza Ndërtimi” sh.p.k ka aplikuar te ministria e linjës për ndërtimin e dy hidrocentraleve të vogla “Munella 1 dhe 2”. Sakaq, këto projekte hidrike janë parashikuar të ndërtohen në përroin e Vaut në qarkun e Lezhës-shkruan Tirana Today.
Ndërtimi i HEC-ve po shkatërron mjedisin dhe biodiversitetin e zonave ku është dhënë leje për të ndërtuar vepra hidrike. Lumi i Valbonës në Tropojë është “sulmuar” në mënyrë brutale, duke shkaktuar një katastrofë mjedisore për zonën dhe gjallesat.
Pavarësisht protestave të shoqërisë civile në mbështetje të Valbonës së “virgjër”, punimet vazhdojnë për ndërtimin e veprave me arsyetimin se do të ketë më shumë investime dhe përfitime për zonën. Ndërtuesit e HEC-ve kanë shpjeguar se me punimet e kryera në Valbonë, nuk po shkatërrohet mjedisi, por përkundrazi ai po merr vëmendjen e munguar prej vitesh.
Ndërtimi i këtyre dy HEC-ve është parashikuar të jetë më kapacitet prodhues deri në 2 mega vat (MW)–shkruan seenews.
Shqipëria prodhon 98% të energjisë elektrike nga HEC-et, shumica nga hidrocentralet përgjatë lumit Drin, në pjesën veriore të vendit. PËRSHTATI TIRANA TODAY.
