Presidenti serb, Aleksandër Vuçiç zhvilloi një vizitë zyrtare në Paris ku u takua me homologun francez, Emanuel Makron. Teksa patën një komunikim me mediat pas përfundimit të takimit, Vuçiç u shpreh se Franca do të mbështesë Serbinë në rrugën e saj Evropiane.
Ai tha se Serbia është gjithmonë e gatshme për bisedime me Kosovën, shkruan Kurir.
“Ne kryesisht biseduam për marrëdhëniet midis Beogradit dhe Prishtinës, i tregova se cili është pozicioni i Serbisë. Unë besoj se do të kemi mbështetje serioze nga Franca në rrugën evropiane. Franca do ta mbështesë Serbinë në rrugën evropiane dhe unë besoj në gjetjen e zgjidhjeve inovative të kompromisit për Kosovën dhe Metohinë. Unë nuk shoh asgjë që mund të na sjellë më pranë një dialog serioz. Ne jemi gjithmonë të gatshëm për bisedime, por çdo marrëveshje kërkon dy palë që përpiqen, por për momentin nuk shoh palë tretë,” tha Vuçiç.
Ndër të tjera, Vuçiç ka folur edhe për deklaratën e Haradinaj në lidhje me bashkimin e Kosovës dhe Shqipërisë, ku tha se kjo është një ëndërr që nuk do të realizohet.
“Ata duhet të kuptojnë se askush nuk do të përmbushë dëshirat e tyre që ata ëndërrojnë, si Shqipëria e Madhe ose çfarëdo që ata kanë imagjinuar. Ne luftuam dhe shpresuam dhe kjo është arsyeja pse nuk kemi dashur ta nënshkruajmë atë në marrëveshjen e përbashkët në Washington. Ne do të shohim nëse Prishtina do të pajtohet me pjesën e saj të marrëveshjes së Washingtonit,” përfundoi ai.
