Mosha e re e popullsisë konsiderohet si shpresa më e madhe e Shqipërisë drejt zhvillimit të shpejtë ekonomik. Por, duket se kjo shpresë po shuhet. Statistika të frikshme janë publikuar së fundmi, ku sipas një vrojtimi të “Galup”, 79% e të rinjve shqiptarë nga 15-29 vjeç duan të largohen përgjithmonë nga Shqipëria. Kjo është norma më e lartë në botë, me diferencë të theksuar nga të gjitha vendet e tjera, përfshirë ato në konflikte të armatosura.
Ndër vendet e rajonit, shifra e dytë më e madhe vihet re në Bosnje-Hercegovinë, me 62 për qind, e më pas Maqedonia me 51 për qind, ndërkohë që për Serbinë dhe Malin e Zi, pjesa e të rinjve që duan të largohen është më e ulët se 50 për qind.
Por, pse të rinjtë shqiptarë duan ta braktisin vendin e tyre?
“Sepse nuk ka punë, sepse është shumë e vështirë jetesa”, thotë një tjetër i ri për kamerën e Top Channel.
Sipas INSTAT-it, në tremujorin e dytë të vitit papunësia për moshat nga 15-29 vjeç ishte 22.6 për qind, gati dy herë më e lartë sesa papunësia mesatare. Por, më shumë sesa mungesa e punës, të rinjtë i largon humbja e shpresës.
“Sepse këtu nuk ka të ardhme”, tha një e re shqiptae.
Largimi i të rinjve po shndërrohet në një nga problemet më të mëdha të Shqipërisë, një fenomen që ka pasoja të mëdha negative për të ardhmen e ekonomisë, financave publike, por edhe në rrafshin social.
Para pak kohësh, kryeministri Rama tha se nuk e sheh si tragjike dëshirën e shqiptarëve për t’u larguar.
“Është pjesë e një procesi historik, siç ka ndodhur vite më parë. Është normale që njerëzit të duan të largohen, ashtu siç ka nga ata që duan të rrinë këtu. Nuk e shoh si tragjike”, pati thënë kryeministri Rama.
