Edhe pse mbylli muajin shtator me 4 pikë të siguruara në dy ndeshje, Kombëtarja Shqiptare ka pësuar një tjetër rënie në renditjen e FIFA-s.
Ekipi i Shqipërisë ka humbur 3 pozicione në krahasim me një mua më parë, duke u renditur tashmë në vendin e 66-të në klasifikimin botëror.
Fitorja me ekipin e Lihtenshtejnit dhe barazimi në fushën e Maqedonisë, e cila pozicionohej më poshtë Shqipërisë në renditjen e FIFA-s, ka bërë që kuqezinjtë të mos sigurojnë shumë pikë nga këto dy ndeshje sipas përllogaritjeve që bëhen për klasifikimin.
Kështu, si pasojë, kuqezinjtë kanë rënë me tre pozicione, të kaluar këtë muaj nga Bolivia, Kina dhe Guinea.
Sa u përket kundërshtarëve të Shqipërisë në grupin e kualifikueseve, Spanja është në vendin e 11, Italia në vendin e 17, Izraeli në vendin e 82-të, Maqedonia në vendin e 103-të dhe Lihtenshtejni në vendin e 137.
Ndërkohë, edhe Kosova ka pësuar rënie me 4 pozicione pas dy humbjeve radhazi në kualifikueset e Botërorit, duke u renditur në vendin e 184-t.
