34-vjeçari i arrestuar për vendosjen e tritolit në banesën e kreut të Federatës Shqiptare të Futbollit, Armand Duka, rezulton me shenja djegie në dorë. Burimet nga polica e kanë konfirmuar për “BalkanWeb” këtë fakt. Dyshimet janë se Arlen Hasanaj është djegur gjatë ndezjes së fitilit, në momentin para se të hidhte kallëpin e tritolit në portën e jashtme të oborrit të Dukës. Këtë e kanë konfirmuar burimet nga polica për “Balkanweb”.
Një ekspert i mjekësisë ligjore nga Tirana, ka mbërritur në dhomat e paraburgimit, ku ka marrë analizat nëse ka gjurmë baruti në dorën e djathtë të Hasanajt. Prokuroria e rrethit mësohet se ka kërkuar “arrest me burg” për 34-vjeçarin, dhe vendimi i ekspertit mjeko ligjor është prova kryesore e organit të akuzës për të zbardhur ngjarjen.
Në ekstraktin e gjeneruar nga faqja zyrtare e Qendrës Kombëtare të Biznesit për subjektin e Arlen Hasanajt thuhet se ai vepron në fushën e: Market, bar, kafe. Për punime të brendshme, thyerje, shembje, rikonstruksione të ndryshme, etj. Veprimtari në fushën e prodhimit, magazinimit dhe tregtimit të prodhimeve e ushqimeve blegtorale e bujqësore. Tregti, import duke përfshirë magazinimin dhe tregtimin me shumicë dhe me pakicë të mallrave ushqimore, industriale, elektroshtëpiake, duhanit dhe cigareve, pijeve të ndryshme alkoolike ose jo, automjeteve, makinerive e pjesëve të këmbimit për to dhe të lëndëve drusore, aksesorë të ndryshëm, etj. Veprimtari në fushën e industrisë blegtorale e ushqimore, ndërtimit dhge tregtimit, etj. Veprimtari tregtare të transportit të mallrave/produkteve të ndryshme ushqimore brenda vendit edhe për persona të tretë, me qira si dhe për llogari të tij. Transport mallrash/produkte ndërkombëtare, për persona të tretë me qira si dhe për llogari të tij. Ai banon në lagjen nr. 4 në qytetin bregdetar, pikërisht në një lagje me Dukën.
Shpërthimi ndodhi menjëherë pasi gjatë ditës së hënë pati një përplasje të fortë mes Dukës, i cili synon mandatin e gjashtë në krye të FSHF, dhe kryebashkiakut të Tiranës, Erion Veliaj. Ky i fundit është regjistruar në një takim me përfaqësues të shoqatës rajonale të futbollit të Tiranës, ku lobonte për kundërshtarët e Dukës në zgjedhjet e 6 marsit, ndërsa e ka akuzuar atë për vjedhje dhe shpërdorim të fondeve për futbollin.