Më shumë se me informacion, duket se publiku është përballur mbrëmë me një show mediatik, në emisionin “Opinion”, ku ishte i ftuar kryetari i Bashkisë së Tiranës, Erion Veliaj.
Ky i fundit përsëriti shpesh se nuk ka ende një projekt konkret për teatrin, pasi pritet shqyrtimi i tyre e më pas do të dalë para publikut me diçka konkrete, ku mund të japë më shumë informacion mbi atë që pritet të shndërrohet Teatri Kombëtar, prishja e të cilit është kundërshtuar nga artistët.
Por, teksa përballej me gazetarët, Veliaj nuk ka ngurruar të përplaset me ta, e shpesh t’i ironizojë.
Kështu, pyetjes së gazetares Ornela Liperi nëse në sheshin pas godinës së re të Teatrit do të ketë ndërtesa të larta, Veliaj iu përgjigj me ironi, duke mos i dhënë një përgjigje të qartë, teksa nuk pranoi të flasë për kulla, apo ndërtesa të tjera që do ndërtohen rreth tij, por tha se prona e bashkisë nuk do të tjetërsohet, ndërsa prona private do të zhvillohet prej tyre.
“Ju jeni të çuditshëm, po bën si një fëmijë i vogël që sapo futet keku në furrë, qan dhe i kërkon mamit kek. Shpirti vogël, prit kekun të piqet…”, i tha Veliaj Liperit si për të thënë se asgjë nuk është vendosur ende.
Nga ana tjetër, Veliaj iu drejtua kryeredaktorit të Panoramës, Robert Rakipllarit me fjalët “gjitholog” apo “biznesmen”.
“Do bëhemi “Disko Lajme” me këtë emision. Je komplet jashtë”, i tha Veliaj, Rakipllarit dhe për ta vënë edhe më në siklet e pyeti nëse është ende aksioner në një universitet privat, por gazetari e mohoi.
