Gjykata e Tiranës ka shpallur fajtor për shpifje ish-deputetin e Partisë Demokratike, Luçiano Boçi, në procesin ndaj ish-ministres së Arsimit, Lindita Nikolla.
Boçi akuzoi Nikollën se do t’iu jepte tenderin e dëftesave personave të afërt me të. Mësohet se Gjykata e ka dënuar Boçin me 70 mijë lekë gjobë.
Ish-deputeti, një vit më parë, nga selia blu denoncoi se rreth 420 mijë nxënës shqiptarë, për herë të parë në historinë e shkollës shqipe ishin pa dëftesa shkollore.
“Të vetmet dëftesa që u printuan dhe u shpërndanë ishin ato të klasës së 9-të, por edhe ato rezultuan me gabime, ç’ka e bën dëftesën dokument të pavlefshëm për 35 mijë nxënës. Një pjesë prej tyre rrezikojnë të mos regjistrohen në shkollë të mesme brenda dhe jashtë vendit”, deklaroi asokohe Boçi.
Ndërsa ish-ministrja e Arsimit Lindita Nikolla, iu përgjigj akuzave duke u shprehur se nuk ka dëftesa me gabime, dhe as vonesa dhe se do e padiste Boçin për këtë deklaratë.
