Mësohen të tjera detaje lidhur me ngjarjen e rëndë që ndodhi sot në Tiranë, ku u lëndua një djalë i ri, pas një shpërthimi në një servis celularësh.
Mësohet se i lënduar ka mbetur shtetasi Gentian Hoxha, 34 vjeç, i cili ka qenë duke punuar në momentin që ka ndodhur shpërthimi. Sipas dëshmitarëve, i riu ka humbur gishtat e duarve, ndërsa ndihmën e parë ia dhanë disa persona që e panë rastësisht shpërthimin.
I plagosuri ka qenë totalisht i nxirë në fytyrë nga tymi, ndërsa shpërthimi ka qenë mjaft i fuqishëm.
Policia ka publikuar një deklaratë zyrtare, ku jep detaje mbi ngjarjen, ndërsa bën me dije se shpërthimi ka ndodhur në tavolinën e tij të punës, kurse dera e jashtme ka qenë e mbyllur.
Njoftimi i policisë:
“Tiranë
Informacion paraprak
Më datë 12.03.2018, rreth orës 10:40, në rrugën ” Qamil Guranjaku ” në një dyqan celularësh në pronësi të shtetasit G.H., 34 vjeç, i cili ishte duke punuar dhe ne pune e siper ka ndodhur nje shperthim nga lende ende e papercaktuar.
Si pasoje është dëmtuar shtetasi G.H i cili u transportua në spital dhe ndodhet nën kujdesin e mjekëve.
Nga shpërthimi ka dhe dëme materiale.
Theksojmë paraprakisht se shtetasi G.H ishte duke punuar në dyqanin e tij dhe derën e jashtme e kishte të mbyllur dhe shpërthimi ka ndodhur ne tavolinen e punes.
Grupi hetimor ndodhet në vendngjarje dhe po punon për sqarimin dhe zbardhjen e plotë të rrethanave të ngjarjes”.
I plagosuri është transportuar për në Spitalin e Traumës ku mësohet se gjendja e tij shëndetësore është stabilizuar.
