Pak pas mesnatës, në lagjen “Drita” në Burrel ka shpërthyer një sasi tritoli në shesh pushimin e një pallati.
Mësohet se tritoli është vendosur vetëm dy metra larg apartamentit të Nezir Rizvani, kryetar i Bashkisë së Matit. Në momentin e shpërthimit nuk ka pasur njeri në banesë, ndërsa si pasojë ka vetëm dëme materiale.
I kontaktuar nga Report Tv, Rizvani ka thënë se ngjarjen e ka mësuar nga komshinjtë, ndërsa ka shtuar se nuk kapasur asnjë konflikt të mëparshëm.
Dyshohet se sasia e lëndës plasëse të ketë qenë rreth 50 deri në 100 gramë.
Njoftimi i policisë:
Rreth orës 00.40, Policia e Komisariatit Mat, ka marrë njoftim se në lagjen “Drita”, Burrel, në shesh pushimin e brendshëm të një pallati është vendosur dhe ka shpërthyer një sasi lëndë plasëse.
Menjëherë në vendngjarje kanë shkuar shërbimet e policisë dhe grupi hetimor, ku nga verifikimet paraprake rezultoi se :
Në lagjen “Drita”, Burrel, në shesh pushimin e brendshëm në katin e katërt të një pallati pesë katësh, midis dy hyrjeve, është vendosur dhe ka shpërthyer një sasi lënde plasëse.
Lënda plasëse ishte vendosur në shesh pushim me një distancë 160 cm larg derës së banesës të shtetasit M.B, rreth 55 vjeç, dhe 2 metra larg derës së banesës të shtetasit N.R, 53 vjeç, Kryetar i Bashkisë Mat.
Në të dy banesat e shtetasve M.B, dhe N.R, nuk ka patur asnjë njeri në banesë.
Si pasojë e shpërthimit janë dëmtuar pjesërisht dy dyert e banesave të shtetasve të lartëpërmendur.
Dyshohet se sasia e lëndës plasëse të ketë qenë rreth 50 deri në 100 gramë.
Grupi hetimor vijon hetimet në vendin e ngjarjes, si dhe po punohet në mënyrë intensive për identifikimin dhe kapjen e autorit/ëve.
