Jozefina Topalli ka reaguar ashpër lidhur me zgjedhjet që do të zhvillohen për kreun e PD-së, duke akuzuar drejtpërdrejt Lulzim Bashën se ka hequr nga lista e anëtarëve të partisë demokratët që nuk e duan, në mënyrë që të mos e dëmtojnë atë.
“Lista sekrete ia jep mundësinë të heqë dhe të vejë, të shpallë “demokrat” ose “armik”, kë të dojë, kë i lëpihet pas zverkut dhe kë i prish pune”, shkruan ndër të tjera Jozefina, ndërsa vijon se peticioni i demokratëve bëhet në emër të PD-së për mbrojtjen e saj nga rrënimi.
“Peticioni nuk mbulohet me shpifje, tallje ose përbuzje. Sa më shumë ta tallin apo përbuzin, aq më fuqishëm do t’u bjerë në kokë njerëzve të rremë, që i kanë hipur në shpinë PD-së dhe e kanë kthyer atë në plaçkë”, përmbyll Topalli.
