Gjatë fjalës së mbajtur në seancën plenare, deputeti Edmond Spaho bëri fajtore për rritjen e çmimeve në vend mazhorancën qeverisëse. Ai tha se dhe Ukraina e cila është në gjendje lufte, nuk ka rritje çmimesh në këto nivele, ndërkohë që në Shqipëri kemi një rritje me 40%. Ndër të tjera ai ironizoi dhe deklaratat e ministreve Belinda Balluku dhe Bora Muzhaqi të cilat kërkuan nga qytetarët që të përdorin më pak makinën, dhe të ecin me këmbë pasi u bën mirë për shëndetin.
“Çështjet e interpelancave urgjence nuk janë pjesë e rendit të ditës. Tani kemi çështjen për debat dhe ndaj duhet të më jepni mua fjalën. Janë kërkesa për interpelancë që ju nuk i keni futur në rendin e ditës. Kemi bërë një kërkesë për të futur debatin për çmimet në rendin e ditës.
E kuptoj shumë mirë shqetësimin e mazhorancës dhe arrogancën në këtë séance, pasi është shumë herë më pak se arroganca me të sillen me qytetarët. S’ka si të ketë sensibilitet për rritjen e çmimeve, kur ministrja e Energjitikës këshillon qytetarët mos shkoni blini bukë me makinë. Nuk ka si të ketë sensivitet kur kryeministri thotë çmimet janë rritur dhe do të rriten. Tha se dhe 45 mijë persona të mblidhen në shesh, taksat nuk hiqen duke sfiduar popullin.
Dhe qershia mbi tortë është kur një tjetër ministre thotë; unë e kam për detyrë të lëviz me makinë, ndërsa ju lëvizni me këmbë; mbroni shëndetin. Më vjen turp për ata që protestojnë thotë kryeministrit, janë të sponsorizuar nga Kremlini, turp ti vi kryeministrit pasi Ukraina është në luftë dhe çmimet nuk ngrihen, ndërsa këtu çmimet janë rritur me 40%. Pse? Se nuk ka shtet”, tha Spaho.
