Deputeti socialist, Ulsi Manja ka akuzuar Prokurorinë se po tenton të mbyllë dosjen e privatizimit të CEZ, sipas tij një nga çështjet më korruptive, pa bërë asnjë lloj hetimi minimal pavarësisht raportimeve dhe gjetjeve të komisionit.
Në një konferencë për mediet, Manja foli ashpër për Prokurorinë, e cila sipas tij vepron në emër të interesave politikë dhe se po tregon se është e kalbëzuar.
“Kuvendi ka marrë fletëthirrje që njofton Kuvendin, në cilësinë e kallëzuesit të shqyrtojë kërkesën e Gjykatës së Tiranës për pushimin e çështjes penale për CEZ. Jemi njoftuar për pushimin e kësaj çështje.
Prokuroria duhet të zbardhte të vërtetën dhe të çonte para drejtësisë autorët e kësaj afere korrupsioni. Prokuroria po përpiqet të mbyllë një nga çështjet më korruptive, skandalit të privatizimit të kompanisë CEZ.
Pa marrë asnjë dëshmitar, pa marrë në konsideratë asnjë nga gjetjet e komisionit, prokuroria e ngritur brenda ditës nuk e vë ujin në zjarr për krimin ekonomik.
Prokuroria po vepron në emër të interesave politikë. Kush janë këta prokurorë që kanë pushtet dhe sillen me drejtësinë si kukullat? Prokuroria po provon me veprimet dhe jo veprimet e saj se është e kalbëzuar”, tha ndër të tjera Manja.
