Elseid Hysaj është një ndër futbollistët më të mirë të kombëtares shqiptare dhe ishte një ndër emrat më të lakmuar në merkaton e verës tek Napoli. Agjenti i mbrojtësit shkodran, Mario Giuffredi ka folur për “Radio Marte”, që ende nuk ka rinovuar, ashtu si ishte folur, për një rritje të mëtejshme të rrogës, sipas planit të vendosur një verë më parë.
Giuffredi zbulon dhe se pa klauzolën e famshme prej 50 milionë eurosh, do të ishte tashmë i Chelsea-t, që e ndoqi. “Tani shoh kritika ndaj tij, por njerëzit kanë kujtesë të shkurtër dhe harrojnë që 1 vit më parë, Elsi ishte më i miri në Serinë A në krah të djathtë dhe mes 2 apo 3 më të mirëve të Europës. Ndërsa, mjafton pak ndeshje që këtë sezon të quhet një bidon… Duhet të flasë gjithmonë fusha”, tha i revoltuar Giuffredi.
Ndërkohë, Elsi ndodhet në grumbullim me Shqipërinë dhe pritet të luajë në Izrael. Por, ka edhe një prapaskenë në lidhje me transferimin e tij te Chelsea. Nuk është shumë klauzola e 50 milionë eurove për jashtë vendit se sa një tjetër pengesë: Aurelio de Laurentis ka formalizuar një akord jo të favorshëm për Maurizio Sarri-n, që duke qenë trajner i Chelsea, nuk mund të blejë lojtarë të Napolit.
