Nënkryetari i Bashkisë së Tiranës, Arbjan Mazniku, i përgjigjet akuzave që Partia Demokratike ka bërë ndaj tij, në lidhje me shpenzimet e kryera gjatë vizitave jashtë vendit.
I ftuar në rubrikën ‘Opinion’ në News24, Mazniku tha se këtyre akuzave do i përgjigjet përmes institucioneve të drejtësisë, teksa shton se ditën e djeshme ka dorëzuar dokumentet dhe provat në Prokurori.
“Besoj që është gjëja më e duhur për të bërë, të gjithë baltës dhe fakenews është mënyra më e mirë për t’ju përgjigjur përmes institucioneve të drejtësisë, të cilat do të bëjnë transparencë për publikun. Shpjegimet i kam bërë dje në prokurori me prova dhe me fakte. Unë kam zgjedhur të mbeten institucional. Kushdo që është bërë pjesë e baltës dhe të pavërtetës duhet të mbajë përgjegjësi pas daljes së të vërtetës. Rruga që kam ndjekur është ajo e drejtësisë. Unë besoj se kemi të bëjmë me ato raste që i mbyturi kërkon të kapet pas një fije kashte”, tha ai.
Mazniku komentoi edhe dëmet e shkaktuar nga tërmeti i 21 shtatorit, ndërsa theksoi se po vijon punën në terren për të dokumentuar dhe riparuar të gjitha dëmet e shkaktuara.
“Ky tërmet ishte më i madhi i regjistruar në Tiranë dhe në vendin tonë në 30-40 vitet e fundit. Për fat të mirë nuk kishim probleme në jetë njerëzish. Problemet janë të limituara në dy kategori, kryesisht në shtëpitë e vjetra në zonat rurale, ndërsa 143 shtëpi janë të pabanueshme. Kemi problemet në ato banesa që janë bërë me shtesa. Po ndjekim rast pas rasti që problemet e shkaktuara nga tërmeti të riparohen sa më shpejt. Ka pasur një seri ndihmash nga vendet ndërkombëtare. Ndihmat kanë shkuar në vend dhe kjo është shumë e sigurt. Ka pasur një gatishmëri të madhe edhe nga bizneset e Tiranës”, u shpreh Mazniku.
