Vendimi i Departamentit Amerikan të Shtetit (DASH), për të shpallur ”non grata’’ ish-kryeminsitrin Sali Berisha dhe familjen e tij, ka gjetur pasqyrim në mediat ndërkombëtare.
US News, Barrons, Reuters, dhe shumë media të tjera kanë shkruar në lidhje me këtë vendim, teksa kanë cituar deklaratën e Sekretarit Amerikan Antony Blinken, ku shprehej se Berisha pasuroi veten, aleatët dhe ka minuar demokracinë në Shqipëri.
”Përcaktimet e Departamentit të Shtetit përdoren për të identifikuar zyrtarisht individët që qeveria amerikane i konsideron të korruptuar ose shkelës të të drejtave të njeriut dhe për të ndaluar hyrjen e tyre dhe anëtarëve të familjes së tyre të ngushtë në Shtetet e Bashkuara.”, shkruajnë mediat ndërkombëtare.
Ndërkohë, agjencia e lajmeve, Reuters ka kontaktuar ish-kreun e qeverisë, por mësohet se Berisha nuk ka dhënë një përgjigje.
Lajmi për shpalljen ”non grata”, u dha nga Sekretari Amerikan i Shtetit, Antony Blinken, i cili njoftoi zyrtarisht se Berisha ka minuar demokracinë, dhe se gjatë ushtrimit të detyrës së kryeministrit, është përfshirë në afera korruptive.
Në faqen zyrtare, DASH ka publikuar vendimin e plotë, ku thuhet se Berisha ka qenë i përfshirë në veprime korruptive për shpërdorim të fondeve publike, dhe ndërhyrje në proceset publike duke përdorur pushtetin.
Në vendimin e tij, Blinken ka përcaktuar si të papërshtatshëm edhe bashkëshorten e ish-kryeministrit Liri Berisha, djalin Shkëlzen Berisha dhe vajzën Argita Berisha Malltezi.
