Shpallet kabineti i ri qeveritar, Haradinaj: BE-në do ta sjellim në Kosovë

I nominuari për kryeministër nga koalicioni PAN, Ramush Haradinaj, ka theksuar se standardet e Bashkimit Evropian do t’i sjellë kabineti i ri qeveritar në Kosovë.

Ai ka përmendur problemet e shumta që ka Kosova me korrupsionin, sistemin e drejtësisë, papunësinë, dhe gjendjen e rëndë në shëndetësi dhe arsim.

Mirëpo, ai nuk ka shpalosur programin e tij qeverisës, të cilin ka thënë se do ta bëjë në një seancë tjetër. “Programin e qeverisë do ta sjellim në seancën e radhës. Para se ky program të sillet tek ju, do ti nënshtrohet një inspektimi të shoqërisë civile”, ka thënë Haradinaj.

Më tej, Haradinaj ka folur për anëtarësimin e Kosovës në NATO, perspektivën ndërkombëtare të Kosovës, edhe për anëtarësimin në BE dhe OKB. “Kosovës I është stërzgjatur anëtarësimi në BE. Do ta ndryshojmë këtë. Kosova nuk do të shkoj në BE, Kosova do të bëhet BE duke zbatuar MSA-në”, ka thënë.

“Të rrisim ekonominë. Të hapim vende të reja punë. Para vetës keni disa orientime programore, por programi i qeverisë do ta sjellim në afat të caktuar.

Për Kosovën është tepër i rëndësishëm konsolidimi i rendit dhe ligjit. Kosova rrezikohet nga rreziqet e reja dhe të vjetra.

Anëtarësimi i Kosovës në NATO, OKB dhe BE është i domosdoshëm. Kosovës i është stërzgjatur rruga për BE. Kosova nuk shkon në BE por bëhet BE.

Do ta forcojmë miqësinë me SHBA. Do të dialojmë edhe me Serbinë. Nuk mund ta ndryshojmë faktin se jemi fqinjë”, ka theksuar Haradinaj.

Gjatë fjalës së tij Haradinaj u është drejtuar në serbisht deputetëve të Listës Serbe.

“Shqiptarët i kanë respektuar të tjerët, e me të gjitha pakicat kemi arritur të kemi bashkëjetesë të përbashkët e besoj se këtë do ta arrijmë së edhe me komunitetin serb” deklaroi ai duke sjellë reagimin e ashpër të deputetëve të opozitës për gjuhën serbe. Seanca është ndërprerë pas debateve, pasi shefi i Grupit Parlamentar të Vetëvendosjes, Glauk Konjufca kërkoi të votohet menjëherë Qeveria Haradinaj për të parë nëse i ka votat.

Kabineti i ri qeveritar:

Kryeministër: Ramush Haradinaj

Zv/kryeministra do të jenë: Behgjet Pacolli, Enver Hoxhaj, Fatmir Limaj, Dalibor Jevtiq dhe Dardan Gashi

Ministër i FSK: Rrustem Berisha

Ministria e Infrastrukturës: Pal Lekaj

Ministria e Financave: Bedri Hamza

Ministria e Shendetësisë: Uran Ismaili

Ministria e Kulturës, Rinisë dhe Sportit: Kujtim Gashi

Ministria e Integrimeve Evropiane: Dhurata Hoxha

Ministrja e Drejtësisë: Abelard Tahir

Ministria e Inovacion dhe Ndërmarrësisë: Besim Beqaj

Ministria e Punës dhe Mirëqenies Sociale: Skender Reçica