Shoqata e Transportit Kombëtar Interurban i ka kërkuar qeverisë të anulojë vendimin për shtimin e linjave të reja urbane. Me anë të një letre, shoqata shkruan se ky vendim nuk është mbështetur në asnjë studim, i cili do të argumentonte nevojshmërinë e këtyre linjave.
Gjithashtu shoqata kërkon pezullimin e procedurës që hapi ministria e Transportit dhe Infrastrukturës për përzgjedhjen se subjekteve që do të operojnë në linjat e rregullta ndërqytetase.
Sasia:
Sipas Shoqatës, katër vite më parë qeveria ndërmori një reformë në këtë sektor, ndërsa u hartuan edhe studime të detajuara nga ekspertë kombëtarë dhe ndërkombëtarë, të cilët përcaktuan se 260 linja janë të mjaftueshme për një shërbim cilësor në këtë sektor. Në shkresë theksohet se ky studim është anuluar më vonë nga drejtuesit e MTI, me pasojë miratimin e 360 linjave të transportit të udhëtarëve.
Gjithashtu, shoqata thekson se, për motive të errëta dhe në kundërshtim me ligjin, gjatë kësaj periudhe janë licensuar shoqëri transporti me probleme dhe joserioze në raport me kriteret ligjore.
“Miratimi i këtij udhëzimi është jo vetëm në shkelje të ligjit, por dhe moralisht nuk duhet të ishte miratuar dhe tenderuar nga një person, i cili ditët në këtë post i ka të limituara nga vullneti i sovranit”, vijon shkresa e Shoqatës së Transportit Kombëtar Interurban, ndërsa theksohet se nëse do të vijohet procedura e tenderimit dhe dhënies së licencave 5- vjeçare atëherë anulimi i tyre do të pasohej edhe nga një kosto e konsiderueshme financiare në dëm të shtetit.
Sipas shoqatës, mungesa e argumentave nga bashkitë përkatëse për shtimin e linjave, është fakt i mjaftueshëm për të pezulluar të gjitha procedurat, të ndërmarra me nxitim para ndryshimit të titullarit aktual të Ministrisë së Transportit.
Një javë më parë Shoqata organizoi një protestë njëditore, që solli paralizimin e transporti interurban, ndërkohë që ministria e konsideroi atë si të jashtëligjshme.
