Përveç gjobave që vendos nëse shkelen rregullat e qarkullimit rrugor, Policia Rrugore edhe të motivon. “Shoferi model” është nisma e lançuar nga policia gjatë kësaj jave, e cila do të jetë e hapur deri të premten.
Bëhet e ditur se do të dhurohen 20 siguracione automjeti për drejtuesit e mjeteve që respektojnë normat e shpejtësisë. Gjithashtu shorteu do të hidhet live ditën e premte në orën 10:00 dhe mund ta ndiqni në faqen zyrtare në “Facebook”-un e Policisë së Shtetit.
“Lotaria hapet për drejtuesit e mjeteve që respektojnë rregullat e qarkullimit rrugor. Një nga faktorët kyë të aksidenteve është dhe shpejtësia. Ne kemi vendosur të përzgjedhim drejtuesin e mjetit model që respekton rregullat e qarkullimit rrugore. Janë vendosur radarët që operojnë në rrugët e Shqipërisë, kanë modul automatik që përveç konstatimit të shpejtësisë tej normave të lejuara, do tregojnë edhe ata që qarkullojnë brenda normave të lejuara. Fituesit do përzgjidhen në një shorte që do jetë live ditën e premte ku do përzgjidhen 20 drejtues që do u dhurohen 20 polica sigurimi. Këto radarë janë vendosur në rrugët dhe akset kryesore aty ku janë identifikuar si njolla të errëta”, ka njoftuar policia.
Kjo e fundit shton se shorteu këtë javë është për shoferët që respektojnë shpejtësinë, në javët e tjera për ata që nuk përdorin telefonin në drejtimin e mjetit, që vendosin rripin e sigurimit, respektojnë këmbësorët.
