Një aksident, fatmirësisht pa pasoja për jetën ka ndodhur këtë të hënë në Librazhd. Një autobus me pasagjerë ka dalë nga rruga, në vendin e quajtur “Kthesa e Murrashit”.
Për fat të keq, në të njëjtin vend ku javën e kaluar humbën jetën tre anëtarët e një familje, sot autobusi doli nga rruga duke rrezikuar që të përfundonte në ujrat e lumit Shkumbin.
Ngjarja është shënuar gjatë mesditës së sotme, ku një mjet që vinte nga Elbasani në drejtim të Librazhdit, për shkak të lagështirës ka dalë nga rruga. Raportohet se pasagjerët kanë shpëtuar pa asnjë dëmtim. Pikërisht në këtë zonë, disa ditë më parë humbën jetën tre anëtarë të së njëjtës familje, pasi mjeti i tyre përfundoi në lumë.
Elbasan / Informacion paraprak
Me datë 07.02.2022, rreth orës 12:00, në aksin rrugor Librazhd-Elbasan, në vendin “Ura e Murrashit’, shtetasi M. L., 29 vjeç banues në Korçë, duke drejtuar mjetin autobuz tip “Benz”, si pasojë e lagështirës në rrugë, ka humbur kontrollin e mjetit dhe ka dalë nga rruga duke u përplasur me bordurën metalike. Nuk ka dëme në njerëz, vetem dëme të lehta materiale.
