Shkrimtarja Flutura Açka ka thënë se nëse do të ishte politikane në Kosovë, do të kërkonte që kryeministri Rama të shpallej person Non Grata.
Shkak për këtë është bërë ironizomi i kryeministrit me çadrën e opozitës, të cilës i ka vënë epitetin “Qadra”.
Kjo gjë ka acaruar shkrimtaren Açka, e cila thotë se përdorimi i kësaj fjale fyen këdo që është nga Veriu i Shqipërisë dhe nga Kosova.
Shkrimtarja ka marrë shkas nga një Amacord i publikuar nga kryeministri për Fishtën, teksa shton se ky i fundit do ndihej i fyer para pak ditësh.
Reagimi i shkrimtares:
Fishta Çadrës i thoshte Qadra, zoti Kryeministër
Me gjithë respektin e madh që kam sa herë njerëzit e politikës përmendin dhe nderojnë njerëzit e kulturës, jam e detyruar t’i kujtoj kryeministrit tim me këtë postim, se atij i ka shtegtuar e drejta e këtij nderimi.
Fishta, po të ishte gjallë, Çadra do ta shqiptonte Qadra, fjalë me të cilën lëçitësi ynë në fjalë fyu para pak ditësh një qytetar të thjeshtë – që iu ankua për ca punëra që politikani duhet t’i bëjë më mirë – për t’i kujtuar atij se ishte alpin a gegë, varet çfarë i shkakton për shumë shpërvjelje atij. Qadra, është fjalë që përdor gati dy e treta e shqiptarëve, duke përfshirë edhe Kosovën. Kështu që një kryeministër që përfaqëson të drejtuarit e shtetit në emër të çdo qytetari të thjeshtë, edhe për ata që nuk e kanë votuar, duhet të kafshojë gjuhën kur flet. Sepse nënkuptimi i fjalës Qadër që ka përdorur pa kurrfarë kujdesi, është një racizëm i pastër dhe i papranueshëm. Unë po të isha politikane në Kosovë, vetëm prej kësaj fjale dhe me shpotitë e shpeshta që u bën alpineve, do ta kisha shpallur Persona Non Grata kryeministrin e Shqipërisë. Kryeministri ka të drejtë te bëjë politikë sa të dojë, t’i bëjë Pozitë Opozitës me të gjitha armët politike që ia lejon ligji, por jo duke përdorur Fishtën, gjuhën e të cilit e fyu tërthorazi para ca ditësh, sepse është një përdorim i pandershëm dhe hipokrit…
