Kreu i Kadastrës, Artan Lame, ka dhënë alarmin pasi ka bërë një pasqyrim se si është gjendja në Arkivin e Kadastrës së Durrësit. Sipas tij, regjistrat në këtë arkiv janë në gjendje që kalojnë çdo imagjinatë, pasi ka shumë mangësi.
Ai kërkoi që të mos ndërhyhet, pasi asgjë nuk ka për të ndryshuar, ndërsa me ironi tha se “kush ka fuqi, le të shkojë te Rama”. Teksa bëri një bilanc të situatës, Lame deklaroi se arkivi ka 1063 regjistra dhe nga këto, 152 regjistra të pasurive të paluajtshme janë në gjendje të mirë. Të tjerët paraqesin prekje dhe ndryshime brenda tyre. Në këto regjistra mungojnë 730 fletë.
“Situata e trashëguar në zyrën e arkivit të regjistrimit të pasurive në Durrës, e kalon çdo imagjinatë. Arkivi ka 1063 regjistra dhe nga këto, 152 regjistra të pasurive të paluajtshme janë në gjendje të mirë, të tjerët paraqesin prekje dhe ndryshime brenda tyre.
Në këto regjistra mungojnë 730 fletë. Mjafton të marrësh një nga këto regjistra, dhe shikon që fleta nga fleta ndryshon. Kushdo që ka punuar qoftë edhe një ditë të vetme në administrate, e di që regjistrat sekretohen, lidhen në mënyrë të pahapshme dhe nuk duhet të preken. Ti mund të shkruash dhe të fshish, por jo të heqësh faqe. Pra vetëm faqet që mungojnë tërësisht.
Rezultojnë 569 faqe të dubluara. Pra shtëpia ose prona e Hasanit ekziston edhe këtu edhe në një vend tjetër si shtëpi dhe pronë e Hysenit. Kur vinte Hasani i jepnin letrat dhe kundër letrat si Hasani, kur vinte Hyseni ia jepnin si Hyseni. Të dy këta ishin në të njëjtën shtëpi, dhe kur përplaseshin çështja përfundonte në gjyq.
Rezultojnë 25 faqe të grisura, duken si pak, por nuk janë pak. Këto faqe edhe kur i kanë grisur i kanë grisur pa kujdes. I ka mbetur vetëm rrënja e faqes që është grisur.
Janë edhe 1548 faqe bosh, janë brenda regjistrit.
Mjaft më me këtë histori dhe këtë situatë. Mos e thoni se ku janë zyrat e Kadastrës, qytetari duhet të aplikojë dhe të presë shërbimin në e-Albania.
Arkivi sot është i inventarizuar. Raporti është 600 faqe dhe ka të dhëna çfarë mungon dhe çfarë nuk mungon dhe askush nuk mund të vërë dorë pa lënë gjurmë. Ka sistem kamerash dhe sistem të mbrojtjes. Ky material do ti përcillet edhe Ministrisë së Drejtësisë dhe zyrës së Kryeministrisë. Vetë drejtoria është gjendur nën sikletet e bërjes së kësaj pune nga ata që nuk e donin të bëhej këtë gjë. Duke e lënë minimalisht në dy institucione, po ua them të gjithëve që mos na bini më në qafë sepse ky material është i shpërndarë edhe në zyra të tjera. Po patët fuqi të shkoni te Rama, ti thoni na ndërro ca fletë të ai raporti i Lames le të shkojnë, përndryshe është e kot të na ndërhyjnë sepse nuk ndërhyhet më”, u shpreh Lame.
