Ndodh edhe kështu, që mësimi të zhvillohet në magazinë dhe deri në oborr. Një gjë e tillë ndodh në shkollën e mesme artistike në Gjirokastër, ku orët e mësimit bëhen madje edhe në korridore, në sallën e mësuesve dhe në drejtori.
E gjithë kjo, pasi shkolla nuk ka mjedise të mirëfillta mësimore. Nxënësit e veglave muzikore ushtrohen ku të munden. Ata të Artit Figurativ në ish-magazinën e shkollës në katin përdhes. Ora e pianos dhe kantos zhvillohen në sallën e Informatikës. Ata me klarinetë përfundojnë në korridor.
“Në një klasë nuk mund të punojmë me shumë instrumente se nuk merren vesh”, thotë Anxhelo Mema.
“Bëjmë mësim tre klasa të pikturës në një klasë. Secili mësues ka metodën e vetë të punuarit. Na shqetëson pak zhurma, sepse piktura do qetësi”, tha Kamela Baka për tch.
Drejtori i shkollës Bujar Dudumi tha se situata është e padenjë për të përgatitur artistë dhe e tillë është që prej viti 2006 kohë kur liceu i rihap.
“Kjo është një shkollë e mesme artistike dhe ka nevojë për atelie. Shumica e lëndëve mësimore zhvillohet në grupe ose individë të specialiteteve të ndryshme të degës së muzikës”, tha drejtori Bujar Dudumi.
Shkolla artistike “Fehim Ibrahimi” në Gjirokastër e vendosur në një godinë të vjetër më shumë se 100-vjeçare në lagjen Varosh është një ndër 9 licetë artistikë në vend dhe e vetmja në jug të vendit. Shkolla ku japin mësim 22 profesionistë po përgatit rreth 50 nxënës në drejtimet pikturë, skulpturë, skulpturë në gur, tekstil, skenografi, grafikë, kanto dhe instrumente si piano, flaut, violinë, fizarmonikë, klarinetë etj.
