Ishulli i ndaluar i Sentinelit të Veriut në Gjirin e Bengalit i populluar nga indianët, është vendi ku udhëtarët shkojnë dhe nuk kthehen pas. Historia është përsëritur sërish dhe një i ri amerikan besohet se është vrarë nga banorët e ishullit. Autoritet kanë filluar detyrën e vështirë për të tërhequr trupin, por duke u kujdesur që të mos shkaktojnë konflikt me banorët.
John Allen Chau, një misionar amerikan është personi i fundit që udhëtoi në drejtim të ishullit dhe nuk u kthye më. Ai kishte tentuar edhe më parë që të shkojë në ishull, por ishte kthyer me plagë shigjetash, pasi ishte sulmuar nga banorët, ndërsa në udhëtimin e dytë ai ka humbur gjurmët. Banorët e ishullit Sentinelit prej vitesh nuk kanë lejuar që të huajt të depërtojnë në territoret e tyre, dhe kush ka zbarkuar në atë ishull nuk është kthyer më.
Disa peshkatarë kanë raportuar pranë autoriteteve se kanë parë John Allen Chau të tërhiqet zvarrë nga sentinelezët. Autoritetet indiane së bashku me peshkatarët kanë shkuan afër ishullit të premten dhe të shtunën në një përpjekje për të gjetur se si të rimarrin trupin.
“Ne nuk e kemi parë ende trupin, por ne e njohim përafërsisht zonën ku besohet të jetë varrosur”, tha Dependra Pathak, zyrtare e lartë e policisë në Andaman dhe Nicobar Islands. “Ne kemi hartuar zonën me ndihmën e këtyre peshkatarëve.”
Pathak tha se grupi zbuloi disa anëtarë të fiseve që mbanin harqe dhe shigjeta dhe ecnin nëpër zonën ku peshkatarët thanë se panë se trupi i Chau u zvarrit dhe u varros.
“Misioni u bë nga një distancë për të shmangur çdo konflikt të mundshëm me banorët e fiseve pasi është një zonë e ndjeshme,” tha ajo. “Ne po diskutojmë me antropologët dhe psikologët rreth natyrës së Sentinelit.”
Pathak tha se ka shumë gjëra për t’u marrë në konsideratë para se të hyjnë në ishull, duke përfshirë edhe psikologjinë e banorëve të saj.
“Ka edhe kërkesa ligjore që duhet të mbajmë në mendje gjatë kryerjes së operacionit. Ne gjithashtu po studiojmë rastin e 2006-ës ku dy peshkatarë vendas u vranë dhe trupat e tyre u gjetën atëherë,” tha Pathak. Policia ka arrestuar të gjithë personat që ndihmuan Chau për të bërë këtë udhëtim, pasi vendasit të gjithë e dinë rrezikshmërinë e atij ishulli. Ndërsa besohet se misioni i John Allen Chau në ishullin e ndaluar ishte që ti njihte ata me Jezusin.
“Ju djema mund të mendoni se unë jam i çmendur, por unë mendoj se është e vlefshme për ta deklaruar Jezusin tek këta njerëz”, është shkruar në ditarin e tij. Ndërsa kishte lënë edhe një letër për familjen ku shkruante: “Ju lutem, mos u zemëroni me ta (sentinelezët), ose me Perëndinë nëse vritem. Përkundrazi, ju lutem, jetoni jetën tuaj.” TIRANA TODAY
