Tashmë, të gjithë të rinjtë, të cilët janë pa kujdes prindëror do të kenë një strehë dhe të gjitha shërbimet që u nevojiten. Sipas, Luneda Sufali, Drejtoreshë e Përgjithshme e Shërbimit Social, në qytetin e Shkodrës është ngritur qendra “Shtëpia familje për fëmijët 16-18 vjeç”. Në këtë qendër do të ofrohet akomodimi, edukimi dhe zhvillimi i aftësive të të rinjve të kësaj moshe.
“Shtëpia funksionon si një familje e madhe. Të rinjtë pa kudjes prindëror, që kanë kaluar nëpër institucione të ndryshme si shtëpia e fëmijës 0 deri në 6 vjeç, kur mbushin moshën 16 vjeç, akomodohen në këtë qendër që ka në fokus socializimin, fuqizimin e tyre. Të rinjtë mund të ndjekin edhe kurse të gjuhëve të huaja brenda qendrës, marrin pjesë në aktivitete kulturore dhe sociale, por edhe pajisen me aftësi për jetën, si të kujdesen për veten, si të gatuajnë, marrin gjithashtu kurse të ndryshme profesione. Pra ata zhvillojnë një jetesë normale si të ishin në një familje biologjike”, tha Sufali.
Për Sufalin e rëndishme është që të rinjtë të jenë të përgatitur për të zhvilluar një jetë të pavaruar pas moshës 18 vjeç.
“Në këtë shtëpi, çdo i ri udhëhiqet nga një lider rinor, e jo sipas konceptit të kujdestarit. Lideri rinor ka si detyrë të kujdeset dhe të monitorojë një të ri të shtëpisë, ai njeh personalitetin e tij, dhe mbikëqyr jetesën e tij brenda shtëpisë dhe jashtë saj te aspekti i edukimit”, tha Drejtorja e Shërbimit Social Shtetëror.
