Operacioni i koduar “Forca e Ligjit” kërkon që të tregojë forcën e policisë dhe sundimin e rregullit në çdo qark të vendit. Pas Fierit, ku u arrestuan tre persona për vrasje dhe drogë, operacioni me po të njëjtin emër këtë herë ka goditur në Shkodër. Policia ka ndaluar grup të strukturuar kriminal, ku u arrestuan 7 persona si dhe u sekuestruan disa pasuri.
Shtetasit e arrestuar janë; Rinard (Frederik) Tota, 50 vjeç, banues në Shkodër, i dënuar disa herë për vepra të ndryshme penale, Kastriot Musa, 41 vjeç, banues në fshatin Barbullush Shkodër, S.M, 32 vjeçe, banuese në qytetin e Shkodrës, e dënuar më parë për veprën penale ushtrim prostitucioni, A.M, 33 vjeçe, banuese në Shkodër, A.Ll, 33 vjeçe banuese në Burrel, A.N, 25 vjeçe, banuese në Lezhe, A.M, 33 vjeçe, banuese në Shkodër, Si dhe është proceduar në gjendje të lirë shtetasi K.N, banues në qytetin e Shkodrës.
Shtetasi Rinard Tota dyshohet se ishte organizator i kësaj veprimtarie kriminale ku prej kohësh shfrytëzonte për ushtrim prostitucioni shtetaset e sipërpërmendura, në lokalin e tij “TATA”, në qytetin e Shkodrës. Ky operacion u finalizua me sukses pas një hetimi disa mujor me aplikimin e metodave speciale të hetimit.
Në cilësinë e provave materiale janë sekuestruar, Ambjenti tre katësh në pronësi të shtetasit Rinard (Frederik) Tota, në të cilin realizohej veprimtaria kriminale, dy automjete tip Benx dhe Land-Rover në pronësi të Rinard (Frederik) Tota, një armë zjarri pistoletën, shtatë ora dore dhe një sasi e konsiderueshme bizhuterishë floriri të ndryshme, një Laptop dhe 8 telefona celularë të markave të ndryshme, një sasi parash të fituara nga ky aktivitet kriminal në prerje të ndryshme lek, euro, dollarë etj.
Policia e Shtetit po vijon punën intensive në kuadër të operacionit “Forca e Ligjit” për realizimin e plotë të objektivit për shkatërrimin e të gjitha grupeve të skeduara kriminale dhe sekuestrimin e aseteve të tyre financiare.
