Në dy vitet e fundit fati i rezervoi një kundërshtarë mjaft të fortë kur ishte një hap grupeve të Europa League, si Genti dhe Milani, por këtë herë për Shkëndijën e Tetovës shanset janë reale dhe kanë të drejtë të shpresojnë deri në fund se do të shkruajnë historinë.
Të besuarit e trajnerit Qatip Osmani do të zbresin mbrëmjen e sotme në fushën e blertë në Norvegji për tu përballur me Rosenborgun. Edhe pse është një ekip me histori në kompeticionet europiane, ky ndoshta është momenti i kuqezinjve të Shkëndijës që të përfitojnë, pasi norvegjezët nuk kanë kaluar një periudhë të mirë në vitet e fundit.
Trajneri Qatip Osmani dhe kapiteni Armend Alimi kanë folur para mediave norvegjeze për objektivin që kanë kuqezinjtë në këtë takim të parë.
“Nesër (sot) dhe pas një jave Shkëndijën e presin dy ndeshje përballë një kundërshtari cilësor si Rosenborgu. Sigurisht që e kemi analizuar kundërshtarin dhe mund te them se bëhet fjalë për ekipin më të suksesshëm në Norvegji dhe ne kemi respekt të madh për të. Rosenborgu është skuadër me shumë eksperiencë, ky është realiteti, por Shkëndija do të bëjë çmos për të kaluar këtë pengesë, për të hyrë më pas në grupet e UEFA Europa League”, – deklaroi trajneri Qatip Osmani.
“Jemi të vetëdijshëm se na presin dy ndeshje të vështira kundër Rosenborgut, mirëpo ne jemi të përgatitur për të bërë hapin e madh në historinë e klubit dhe shpresoj se mund t’ia arrijmë qëllimit”, – tha kapiteni Armend Alimi.
Ndeshja e parë do të zhvillohet, sot, në orën 20:45, në “Lerkendal Stadion” të Trondheim. Pas konferencës për shtyp kuqezinjtë zhvilluan seancën stërvitore zyrtare në “Lerkendal Stadium”, ku mungesa e vetme do të jetë Bejtullai, i cili ka plotësuar numrin e kartonëve të verdhë.
