Një grua 20-vjeçare, e cila ka lindur me një vesh të djathtë të vogël dhe të deformuar, ka marrë një implant veshi të printuar 3-D të bërë nga qelizat e saj. Ekspertët e pavarur thanë se transplanti, pjesë e provës së parë klinike të një aplikimi të suksesshëm mjekësor të kësaj teknologjie, ishte një përparim mahnitës në fushën e inxhinierisë së indeve.
Veshi i ri u printua në një formë që përputhej saktësisht me veshin e majtë të gruas, sipas 3DBio Therapeutics, një kompani e mjekësisë rigjeneruese me qendër në Queens. Veshi i ri, i transplantuar në mars, do të vazhdojë të rigjenerojë indet e kërcit, duke i dhënë pamjen dhe ndjesinë e një veshi natyral, tha kompania.
“Është padyshim një punë e madhe”, deklaroi Adam Feinberg, një profesor i inxhinierisë biomjekësore dhe shkencës dhe inxhinierisë së materialeve në Universitetin Carnegie Mellon. Dr. Feinberg, i cili nuk është i lidhur me 3DBio, është një bashkëthemelues i FluidForm, një kompani e mjekësisë rigjeneruese që përdor gjithashtu printimin 3-D. “Ajo tregon se kjo teknologji nuk është më një ‘nëse’, por një ‘kur’,” tha ai.
Rezultatet e operacionit rindërtues të gruas u njoftuan nga 3DBio në një njoftim për shtyp. Kompania nuk ka bërë publike detajet teknike të procesit, duke e bërë më të vështirë vlerësimin e ekspertëve të jashtëm. Kompania tha se rregullatorët federalë kishin rishikuar modelin e provës, dhe kishin vendosur standarde strikte të prodhimit dhe se të dhënat do të publikoheshin në një revistë mjekësore kur studimi të përfundonte.
Prova klinike, e cila përfshin 11 pacientë, është ende në vazhdim, dhe është e mundur që transplantet mund të dështojnë ose të sjellin komplikime të paparashikuara shëndetësore. Por meqenëse qelizat kanë origjinën nga indet e vetë pacientit, veshi i ri nuk ka gjasa të refuzohet nga trupi, thanë mjekët dhe zyrtarët e kompanisë.
Suksesi i 3DBio, shtatë vjet në zhvillim, është një nga disa zbulime të fundit në kërkimin për të përmirësuar transplantet e organeve dhe indeve. Në janar, kirurgët në Maryland transplantuan zemrën e një derri të modifikuar gjenetikisht tek një burrë 57-vjeçar me sëmundje të zemrës, duke ia zgjatur jetën me dy muaj. Shkencëtarët po zhvillojnë gjithashtu teknika për të zgjatur jetën e organeve të donatorëve, në mënyrë që ato të mos shkojnë dëm.
Burimi i lajmit: The New York Times. Përshtatur nga Tirana Today
