Shkencëtarët në Australi do të testojnë panele diellore të printuara, për të fuqizuar një veturë Tesla për një udhëtim prej 15.100 km, që do të nisë në shtator. Ata shpresojnë se kjo do ta shtyjë publikun të mendojë për hapat, për të ndihmuar në shmangien e ndryshimeve klimatike.
Projekti Charge Around Australia do të fuqizojë një makinë elektrike Tesla me 18 panele diellore plastike të stampuara të ekipit, secila prej 18 metrash, duke i vendosur ato pranë automjetit për të thithur rrezet e diellit kur ajo ka nevojë për një karikim.
Paul Dastoor, shpikësi i paneleve diellore të printuara, tha se ekipi i Universitetit të Newcastle do të testonte jo vetëm qëndrueshmërinë e paneleve, por performancën e tyre të mundshme për aplikime të tjera.
“Ky është në fakt një shtrat ideal testimi, për të na dhënë informacion se si do të përdornim dhe fuqizonim teknologjinë në vende të tjera të largëta, për shembull, në hapësirë”, i tha Dastoor “Reuters”, në qytetin Gosforth, në veri të Sidneit.
Solar i printuar është një plastikë PET e lehtë, e laminuar që mund të bëhet me një kosto prej më pak se 10 dollarë për metër katror.
Panelet janë bërë në një printer komercial të përdorur fillimisht për printimin e etiketave të verërave. Dastoor tha se përdorimi i paneleve për të fuqizuar një makinë, do t’i bënte australianët të mendonin më shumë për automjetet elektrike, dhe mund të ndihmonte në lehtësimin e “ankthit të tyre në distancë”.
“(Komuniteti) po kërkon këto lloj përgjigjesh për problemet me të cilat po paraqitet, çdo ditë, rreth ndryshimeve klimatike”, tha ai.
Në udhëtimin e tyre 84-ditor në Tesla, ekipi planifikon të vizitojë rreth 70 shkolla, për t’u dhënë studentëve një shije të asaj që mund të presë e ardhmja.
I pyetur se çfarë mund të thoshte Elon Musk, krijuesi i makinës Tesla dhe themeluesi i Tesla Inc TSLA.O, për projektin CAA, Dastoor tha se shpresonte se do të ishte i kënaqur.
Burimi i lajmit: CNN. Përshtatur nga Tirana Today
