Prokurori i Krimeve të Rënda, Gentian Osmani është shkarkuar nga detyra. Vendimi për shkarkimin e tij është marrë nga Kolegji i Posaçëm i Apelimit.
Prokurori, i cili është gjithashtu anëtar i Këshillit të Lartë të Prokurorisë, kishte kaluar procesin e vetting-ut në Komisionin e Pavarur të Kualifikimit, por vendimi u ankimua në KPA nga Komisioneri Publik me rekomandim të Operacionit Ndërkombëtar të Monitorimit.
Trupi gjykues përbëhej nga Natasha Mulaj dhe anëtarë Albana Shtylla, Ardian Hajdari dhe Rezarta Schuetz.
Në seancën e kaluar, gjatë parashtrimit të konkluzioneve përfundimtare, Komisionieri Publik i qëndroi kërkesës për ndryshimin e vendimit të KPK dhe kërkoi shkarkimin nga detyra të subjektit të rivlerësimit Gentian Osmanit.
Subjekti i rivlerësimit kundërshtoi secilin prej shkaqeve të ankimit të Komisionerit Publik, bazuar në të gjitha provat e depozituara prej tij gjatë procesit gjyqësor dhe kërkoi lënien në fuqi të vendimit të KPK.
Edhe pse KPA hodhi poshtë disa prej ankimimeve të Komisionerit Publik, në fund ka qenë mungesa e mbulimeve të shpenzimeve për dy vite nga ana e Osmanit që solli vendimin për shkarkimin nga detyra.
Gentian Osmani është i njohur si një nga ish-prokurorët e çështjes “Tahiri”.
