Carlo Ancelotti nuk do të jetë më trajner Bayern Munchen. Tekniku italian pas humbjes 3-0 nga Paris Saint Germain është shkarkuar nga drejtimi i klubit bavarez. Menjëherë pas mbërritjes në Mynih, bordi drejtues i ekipit ka zhvilluar mbledhje për situatën e ekipit. “ESPN” raporton se pasdite pritet që trajneri të dalë në një konferencë për shtyp ku do t’u përgjigjet pyetjeve të gazetarëve. Presidenti Karl-Heinz Rummenigge paralajmëroi në fund të ndeshjes se do të kishte pasoja pas disfatës në Paris.
Disfata në Paris 3-0 nuk mund të pranohet nga drejtuesit dhe si duket i sakrifikuari do të jetë tekniku italian. Edhe lojtarët nuk janë shprehur shumë të kënaqur pas humbjes, ka qenë Arjen Robben që ka folur pas ndeshjes dhe ka thënë: “Zhvilluam një ndeshje të shëmtuar dhe fajin për këtë e ka i gjithë ekipi. Ne duhet të punojmë shumë që të arrijmë të marrim rezultate pozitive në vijim. Sonte na mungoi organizimi dhe e kishim shumë të vështirë të dilnim në sulm”. Ndërsa pyetjes nëse jeni në mbështetje të teknikut Ancelotti, holandezi thotë se nuk ka përgjigjie dhe tregon një fytyrë të mërzitur.
Kjo të bën të kuptosh se ka një krisje edhe me grupin e lojtarëve të cilët nuk janë të kënaqur me atë që po japin në fushë nën drejtimin e Ancelottit. Bavarezët mendojnë menjëherë zëvendësuesin e italianit dhe i pari në listë qëndron Jurgen Klop, ish trajner i Dortmund. Në rast se Klop nuk arrihet, i dyti në listë do të jetë Julian Nagelsmann aktualisht trajner i Hoffenheim.
