Gjykata e Lushnjes ka pezulluar nga puna 16 mësues në fshatin Çermë e Sipërme, të akuzuar për shpërdorim detyre.
Bëhet me dije se mësuesit akuzohen pr falsifikim të dokumenteve shkollore. Ata kanë regjistruar nxënës fiktivë në shkollën e fshatit, përgjatë viteve 2013 – 2017. Ka qenë kërkesa e Prokurorisë së Lushnjes për të pezulluar nga puna mësuesit, kërkesa e cila u pranua nga gjykata.
“Gjykata Lushnje pranoi kërkesën e Prokurorise Lushnjë, me vendim nr 119 datë 13.09.2018, për pezullimin nga detyra të 16 mësueseve të shkolles 9-vjeçare, Çermë e Siperme- Divjake rrethi Lushnje. Sipas burimeve, për ta ka regjistrim si persona nën hetim me akuzat “Shpërdorim detyre dhe falsifikim i dokumenteve shkollore. Komunikimi i masës për mësueset është bërë më datë 14.09.2018”, thuhet në njoftim
Lidhur me këtë ngjarje ka reaguar Ministria e Arsimit, Sportit dhe Rinisë, ku sipas saj në bashkëpunim me prokurorinë e Lushnjës ka ndjekur me seriozitet situatën deri në pezullimin e 16 mësuesve në shkollën 9-vjeçare të fshatit Çermë e Sipërme në Lushnje.
Sqarimi i Ministrisë së Arsimit
Bazuar në kallëzimin e bërë gjatë viteve 2010-2013 se në shkollën 9-vjeçare Çermë e Sipërme ka pasur regjistrime fiktive, Prokuroria e Lushnjës ka regjistruar procedimin penal për “Falsifikimin e dokumenteve shkollore”.
Prokuroria e Lushnjës ka filluar hetimet prej disa kohësh për këtë rast duke kërkuar sot nga gjykata pezullimin e 16 mësuesve.
Ky vendim është zbatuar menjëherë nga Zyra Arsimore Lushnje duke marrë masa të menjëhershme për zëvendësimin e këtyre mësuesve dhe mos pasur asnjë pengesë për mbarëvajtjen mësimore.
Ministria e Arsimit mbështet vijimin e hetimit nga organet ligj-zbatuese dhe siguron se për nxënësit e shkollës nuk do të ketë asnjë pengesë për të vijuar normalisht procesin mësimor.
Ftojmë prindërit, mësuesit dhe nxënësit të denoncojnë çdo shkelje apo parregullsi të konstatuar në sistemin tonë arsimor.
