Dje në një takim me dyer të mbyllura, socialistët mblodhën Kryesinë, ku vendosën shkarkimin e 11 drejtuesve të degëve të PS në rrethe.
Në një prononcim për mediat, Elisa Spiropali tha se kryetarët e shkarkuar ishin vonuar me procesin e riorganizimit të partisë, në fushatën e anëtarësimeve.
Ajo u mundua të shmangte pyetjet ngacmuese, duke thënë se nuk e kishte listën e kryetarëve të shkarkuar, por bëhej fjalë për zonat ku bashkitë drejtohen nga opozita.
Ndërkohë në media u publikuan disa prej degëve ku janë shkarkuar krerët e PS-së. Bëhet fjalë për Cërrikun, Devollin, Memaliajn, Selenicën dhe Delvinën.
Pikërisht këto dy të fundit, janë edhe dy bashki të cilat përfshihen në qarkun e Vlorës, zonën elektorale të kryeministrit Rama.
