Policia ka arrestuar 22-vjeçarin Igli Madani, i cili dyshohet se është shkaktari i aksidentit të rëndë të ndodhur ditën e sotme në aksin rrugor Fier-Vlorë, ku u shua një familje me 4 anëtarë.
Sipas uniformave blu, i riu ka humbur kontrollin dhe ka goditur nga mbrapa automjetin tip “Toyota”, dhe si pasojë ndërruan jetë 4 shtetasit që udhëtonin me këtë automjet. Nga përplasja, ka mbetur i dëmtuar vetë Madani dhe dy pasagjerët që ndodheshin me të, të cilët ndodhen në spital, nën kujdesin e mjekëve.
Njoftimi i policisë
Specialistët e Qarkullimit Rrugor në Drejtorinë Vendore të Policisë Vlorë arrestuan në flagrancë shtetasin:
- Igli Madani, 22 vjeç, banues në Tiranë, pasi duke drejtuar automjetin tip “Audi”, në aksin rrugor Fier-Vlorë, dyshohet se ka humbur kontrollin dhe ka goditur nga mbrapa automjetin tip “Toyota” me drejtues shtetasin E. G., 44 vjeç dhe si pasojë ndërruan jetë 4 shtetasit që udhëtonin me mjetin mjetin “Toyota”. Gjithashtu, si pasojë ka mbetur i dëmtuar vetë drejtuesi i mjetit “Audi” dhe dy pasagjerët, të cilët ndodhen në spital, nën kujdesin e mjekëve.
Materialet në ngarkim të tij i kaluan Prokurorisë pranë Gjykatës së Shkallës së Parë Vlorë për veprën penale “Shkelja e rregullave të qarkullimit rrugor”.
Si ndodhi aksidenti?
Të dy mjetet po udhëtonin nga Fieri drejt Vlorës, për të kaluar fundjavën në jug. Automjeti tip “Audi” me targa AA 107 XX e cila drejtohej nga disa të rinj, që po vinte nga Fieri, me shpejtësi që mendohet se ishte mbi 150 km në orë, dyshohet se ka goditur nga pas makinën tip “Toyota”, e cila nga përplasja ka humbur kontrollin dhe ka dalë nga rruga, duke përfunduar në kanal.
Ndërkohë, mjeti tip “Audi” është spostuar për disa metra, dhe më pas është përplasur me një shtyllë dhe ka dalë nga rruga. Ekspertiza do të përcaktojë shkaqet e aksidentit, ndërkohë që një tjetër shkak i aksidentit mund të jetë që makina “Toyota” të ketë ndërruar korsi dhe për pasojë është marrë para nga “Audi”, i cili vinte me shpejtësi shumë të lartë.
Viktimat, nga Patosi i Fierit
Katër viktimat e aksidentit të sotëm në autostradën Fier-Vlorë, në vendin e njohur si “Kripë”, janë nga Patosi i Fierit. Familja u shua sot në aksin Fier-Vlorë, pranë fshatit Panaja, ose zonës së njohur si “Kripa”. Familja sapo kishte ardhur nga Greqia, dhe po shkonte me pushime, ndërsa çantat dhe valixhet që ndodheshin në makinën e tyre tip “Toyota” janë shpërndarë në rrugë.
Aksidenti tragjik në vendin e quajtur “Zona e Kripës” në hyrje të Vlorës, i mori jetën Eduart Gushit, 44 vjeç, bashkëshortes Silvana Gushi 33 vjeç dhe dy vajzave Anastasia Gushi 14 vjeç dhe Eva Gushi, 9 vjeç.
