Kreu i grupit parlamentar të PS-së, Taulant Balla, ka reaguar lidhur me konfliktin e ndodhur dy ditë më parë në Bruksel, ku demokratët kërkuan perjashtimin e tij nga delegacioni parlamentar për integrimin. Në një deklaratë nga kryesia e Kuvendit, Balla tha se sjellja e PD në Bruksel, ishte një akt i turpshëm.
“Ajo shfaqje e turpshme, le të jetë një akt i fundit i sjelljes në vite të ndryshme të politikës shqiptare në Bruksel.
Një prej miqve të Shqipërisë, në përfundim të asaj dite pune, solli në vëmendje që nuk ka pasur dhe nuk ka një vend tjetër në rrugën e anëtarësimit në BE, që opozita të shfrytëzojë mikrofonat e sallave të PE, apo të Këshillit, Komisionit, për të sharë vendin e vetë. Kemi çfarë kemi, duhet t’i diskutojmë këtu.
Është vijimi i një profesi historik për Shqipërinë, dhe shqiptarët.
Si një prej përfaqësuesve më të vjetër të Shqipërisë në PE, kurrë më parë Shqipëria në PE nuk ka pasur më shumë miq sesa sot.
Kurrë më parë nuk kemi arritur të marrim një produkt final. Një deklaratë që thotë se Komiteti i Stabilizim Asociimit kërkon hapjen e negociatave në qershor 2019, në vijim të vendimit të Këshillit Europian të 28 qershorit.
Pavarësisht kësaj, ajo që është e rëndësishme sot, deklarata, rekomandimet përfundimtare, flasin për një ndërprerje të bojkotit nga ana e opozitës.
Ricitoj një qëndrim të PPE. Z.Daul, i cili e njeh shumë mirë Shqipërinë, dhe që në të njëjtën referencë me Maqedoninë dhe partinë simotër atje, flet edhe për PD në Shqipëri. E cila, unë vlerësoj që duhet të reflektojë edhe pas kësaj deklarate, këtyre rekomandimeve, të ndërpresë bojkotin dhe të marrë përgjegjësitë që i takojnë.
I kemi besuar opozitës dy institucione që kanë lidhje me integrimin. Komisionin e Integrimit dhe Këshillin Kombëtar të Integrimit”, përfundoi Balla.
