Në Mal të Zi është shënuar viktima e parë nga koronavirusi.
Sipas autoriteteve përkatëse, bëhet fjalë për një burrë të moshës 65-vjeçare, i cili ka ndërruar jetë në Qendrën Klinike në Podgoricë.
“Ai është viktima e parë me Covid-19 në vend”, tha drejtori i Qendrës Klinike, Jevto Erakovic. Mali i Zi është vendi me më pak të prekur në Ballkan, me vetëm 21 të infektuar nga koronavirusi.
Kujtojmë se COVID-19 ka prekur shumë vende të botës, ndërkohë situata paraqitet më kritike në Itali.
Dr. Jennifer Nuzzo (Nazo), epidemiologe në Universitetin Johns Hokins ka deklaruar se në skenarin më të frikshëm, një rritje e shumëfishtë e pacientëve do të tejkalojë në masë kapacitetet e shëndetit publik.
Ekspertja këshillon që përvoja e Italisë të shërbejë si paralajmërim i rrezikut që i kanoset çdo vendi në rrethana të caktuara: “Ky kërcënim i kanoset çdo vendi, sado të pasur e stabilizuar nëse bashkohen disa faktorë. Një përqindje shumë e lartë e rasteve në Itali janë individë me rrezikshmëri të lartë për t’u sëmurur, apo në rrezik vdekjeje. Këta janë individët e moshuar. Në vende të tjera si Koreja e Jugut dhe Singapori që ishin më të suksesshëm në reagim, ndoshta kjo ndodhi pasi patën fatin e mirë se sëmundja ishte e kufizuar tek popullata në moshë më të re”.
