“Shengeni ballkanik” luftë varfërisë në Kosovë? Ja si përgjigjet Albin Kurti

Kreu i Vetëvendosjes, Albin Kurti, ka folur rreth mundësisë së krijimit të ‘Shengenit Ballkanik’, teksa shprehet se nuk e sheh atë si një mënyrë për të luftuar varfërinë.

Në një intervistë për emisionin “Tempora”, Kurti deklaroi se Kosova është e varfër sepse nuk ka akumulim të kapitalit dhe akumulimi i kapitalit vjen nga prodhimtaria

Kurti shtoi se Kosova duhet të kthehet në një popull prodhues, krijues dhe jo në një popull konsumator që mezi mbijeton.

“Nuk besoj që ne jemi të varfër sepse i mungon liria e qarkullimit të kapitalit apo njerëzve. Por ne jemi të varfër, e të papunë sepse nuk kemi akumulim të kapitalit dhe akumulimi i kapitalit vjen nga prodhimtaria. Prodhimtaria është industriale, bujqësore dhe zejtare dhe ne kemi deficite të tmerrshme tregtare, të cilat na i mbulon dhe përkthehet në mbijetesë, Diaspora jonë me remitancat e shumta. Shqipëria e ka diasporën e saj në Itali e Greqi, Kosova e ka në Zvicër dhe në Gjermani dhe ata neve na kompensojnë për ato deficite të tmerrshme tregtare që i kemi. Në Kosovë raporti 1 me 9, në Shqipëri nëse nuk gaboj është 1 me 3. Ne duhet të kthehemi në një popull prodhues, krijues dhe jo në një popull konsumator që mezi mbijeton. Kjo nuk ka të bëjë me lirinë e kapitalit, edhe të financave, edhe të njerëzve. Kjo ka të bëjë me mungesën e bazës industriale të prodhimtarisë vendase, e cila do të na i zëvendësonte importet dhe do të na rriste eksportet”, deklaroi Kurti.