Shemsi Aliaj, ka qenë ndër agjentët më të mirë të shërbimit sekret shqiptar. Në vetëm pak vite, ai arriti që nën mbulesën e punonjësit të ambasadës shqiptare në Romë, të krijojë një rrjet të gjerë informatorësh në radhët e zyrtarëve italianë, në duart e të cilëve qarkullonin të dhëna sekrete që i interesonin shtetit shqiptar. Arritja më e madhe e Aliajt, ishte rekrutimi në vitin 1953 i shefit të Shifrimit në Ushtrisë Italiane.
Duke mësuar mbi pasionin e italianit për pijet, ai organizon një kontakt në pamje të parë të rastësishëm me italianin, dhe më pas bëhen shpejt shokë të uiskit. Në gjendje të dehur ai arrin t’i marrë një firmë zyrtarit italianit, dhe me të e shantazhon derisa arrin ta rekrutojë. Materiali i parë i rëndësishëm në duart e agjentit shqiptar, ishte një filmim rreth 2 orë i një stërvitjeje sekrete të NATO-s.
Synimi i Enver Hoxhës, ishte të merrte vesh paraprakisht nëse aleanca perëndimore kishte ndonjë plan për pushtimin ushtarak të Shqipërisë. Aliaj u kap më në fund nga agjentët e Shërbimit Sekret Italian, ndërsa ndodhej në praninë e dy prej bashkëpunëtorëve të tij italianë. Ai u shpall “non grata”, dhe u dëbua nga vendi fqinj. Pas kthimit në Shqipëri, u shkarkua nga funksionet, dhe u caktua si një ushtarak i thjeshtë. Në dy letra të viteve 1995 dhe 1959, ai kërkoi me dëshpërim rikthimin në detyrë, por nuk mori asnjëherë përgjigje.
