Në orët e para të mëngjesit të 17 Majit, në Tiranë u shemb Teatri Kombëtar dhe kjo ngjarje ka shkaktuar revolta të shumta.
Ndërkohë së fundmi, disa qytetarë shqiptarë dhe italianë kanë zhvilluar një protestë në Padova, Itali, për Teatrin Kombëtar, i cili u shkatërrua nga Bashkia e Tiranës.
Protesta në fjalë është realizuar në mënyrë paqësore, para Pallatit Moroni, ku u shprehën shqetësime të shumta për trashëgiminë kulturore shqiptare.
“Dy javë më parë, në 4:30 të mëngjesit në Tiranë, një vend pranë Padovas, pranë Italisë, u shkatërrua një simbol kulturor që duhet të bashkonte këto vende.
Ne kemi nevojë për kulturën, për urat që lidhin dy anët sepse është e shkuara jonë dhe e ardhmja. Trashëgimia kulturore duhet t’iu përcillet brezave të rinj.
Për këtë arsye ne dënojmë shembjen e Teatrit Kombëtar të ndërtuar nga italianët dhe dënojmë edhe dhunën e përdorur nga policia kundër intelektualëve, kundër popullsisë civile”, u shpreh Elda Omari, arkeologe dhe historiane e arteve.
“Një vend pa të kaluar, pa memorie, është një vend pa identitet”, thuhet në kronikën e “TV7”.
