Në një kohë ankthi e tensioni, kur pritet nëse ligji për shembjen e Teatrit Kombëtar të dekretohet apo jo nga presidenti Meta, artistët bashkërisht i kanë dërguar atij një letër, ku kërkojnë rishikimin e projektligjit.
Në një deklaratë para mediave nga jashtë institucionit të Presidencës, artistët i kanë kërkuar Metës një takim.
Në letrën në fjalë thuhet se Meta duhet të ndërhyjë për të rishikuar ligjin, si hallka e fundit. Sipas tyre, përgjegjësia bie mbi Metën, dhe kjo është vendimtare. “Përgjegjësia bie mbi ju dhe është vendimtare. Ligji shkel balancën mes pushteteve. Ju duhet të ishit filtri i parafundit në këtë proces. Por meqë mungon Kushtetuesja, ju jeni filtri i fundit. Riktheheni atë për rishqyrtim”, thuhet në letër.
Pak ditë më parë, aktorët janë ankuar tek ambasadorja Vlahutin.“I bëjmë edhe njëherë thirrje, në emër të Aleancës, Z. President të mos e dekretojë këtë ligj për sa kohë që në këtë vend akoma nuk ekziston Gjykata Kushtetuese, e cila do të na jepte ne mundësi që të bënim rekurse apo apelime për këtë ligj, të cilin ne e kemi cilësuar që në fillim të padrejtë”, tha Alert Çeloaliaj. Këtë apel të hapur, Aleanca për Mbrojtjen e Teatrit e bëri pas takimit me Ambasadoren e BE, Romana Vlahutin.
Duke qëndruar në të njëjtën linjë, po kështu edhe kreu demokrat, Lulzim Basha, në një bashkëbisedim me gazetarët, theksoi qëndrimin e pandryshuar të Partisë Demokratike, për të mos u dorëzuar në përpjekjen për të mbrojtur Teatrin Kombëtar, si pjesë e trashëgimisë kulturore të vendit, nga prishja e planifikuar nga qeveria.
Para tij ka qënë Meta, i cili nënvizoi se nuk do të ndikohet nga asnjë faktor, jashtë përgjegjësive që ka presidenti.
“Dua t’iu siguroj që në çdo vendim nuk do të ndikohem nga asnjë faktor, jashtë atyre përgjegjësive që ka presidenti, në mbajtjen e qëndrimeve të tilla”, deklaroi Meta.
