Kryeministri Rama ka folur për herë të parë për projektin e rehabilitimit në Shkozë ku parashikohet prishja e shtëpive të banorëve të kësaj zone. Duke replikuar me ndjekësit e tij në Facebook, kryeministri Rama shpjegoi se çdo të ndodhë me shtëpitë e këtyre banorëve.
Një komentues e kritikon kryeministrin se nuk ka reaguar pas përplasjes së policisë pak ditë më parë me banorët që kishin bllokuar rrugën në shenjë proteste. Ndërsa Rama thotë se shtëpitë në këtë zonë do të prishen ndërsa bashkia e Tiranës do t’u ofrojë bonus qiraje si të pastrehë.
Sipas tij, familjet në këtë zonë janë në dijeni prej kohësh të kësaj situate. “Për Shkozën është shumë e qartë Roni, s’ka asgjë për të kthyer përgjigje: Janë ndërtime pa leje në mes të një rruge kryesore të Tiranës dhe duhet të prishen, ndërkohë që banorëve Bashkia e Tiranës duhet t’u ofrojë bonus qiraje si të pastrehë! Familjet këtë e dinë prej kohësh dhe s’ka asnjë shans as për ta dhe as për askënd tjetër që të legalizohen në mes të rrugëve e pastaj të shpronësohen me paratë e kopshteve, çerdheve, spitaleve, për të hapur rrugën që është e të gjithëve!”, është përgjigjur Rama.
