Ministria e Kulturës ka ndarë çmimet e mëdha të Letërsisë, për vitin 2016, konkretisht “Vepra më e mirë e vitit e Letërsisë Shqipe” dhe “Vepra më e mirë e vitit e përkthyer”.
Vepra “Shekspirotët” e shkrimtarit Idlir Azizaj është shpallur “Vepra më e mirë e vitit të Letërsisë Shqipe” për vitin 2016.
Kjo vepër është shkruar në një zhanër që ndërthur imagjinatën groteske me peizazhin dramaturgjik. Rezultati është një tekst ku thuren me nerv dhe humor të zi në unitet mjedisi i trazuar shqiptar i shekullit XXI me një stil moderniteti.
Po ashtu, çmimi “Vepra më e mirë e vitit e përkthyer” iu dha përkthyeses Diana Kastrati me veprën “Kanali Musolini” i autorit Antonio Pennacchi.
Juria ishte e përbërë nga Primo Shllaku, në cilësinë e kryetarit të jurisë dhe anëtarët: Flutura Açka, Elsa Demo, Bajram Karabolli dhe Lisandri Kola.
