Real Madrid mposhti PSG-në të mërkurën në mbrëmje në përballjen e Champions League me rezultatin 3-1, në “Bernabeu”. Por kjo sfidë kaq e madhe nuk mund të kalonte pa kontestime nga pala humbëse. Ka qenë presidenti i parisienëve, Nasser Al-Khelaifi, i cili ka akuzuar arbitrin e ndeshjes, Gianluca Rocchi, se e favorizoi gjigantin spanjoll.
PSG nuk arriti të tregojë vlerat që ka në ekip, ku nuk funksionoi si duhet “tridenti” i sulmit me Neymar-Cavani-Mbappe. Pika më e dobët ishte qendra e sulmit, me uruguaianin që nuk arriti të jetë asnjëherë i rrezikshëm para portës së madrilenëve.
Parisienët kaluan të parët në avantazh me Rabiot, por nuk arritën të ruanin avantazhin pasi dygolëshi i Ronaldos dhe goli i Marcelos në fund përmbysi gjithçka. Njëri nga golat e Realit u shënua nga pika e bardhë e penalltisë, e cila u fitua nga mesfushori Toni Kroos dhe u ekzekutua nga Ronaldo. Edhe PSG kërkoi një penallti kur goditja e Rabiot u ndal në dorën e Sergio Ramos, por ankesat e lojtarëve nuk u morën për bazë nga arbitri dhe nuk u akordua penallti.
Për këtë arsye presidenti i gjigantit francez pohon se PSG vuan nga gjyqtarët kur luan ndaj klubeve të mëdha evropiane. “Kur luajmë kundër klubeve të mëdha, gjithmonë ndodh e njëjta gjë, gjithmonë. Vitin e kaluar kundër Barcelonës, këtë vit kundër Real Madridit. Në rregull, Reali është klub i madh, por mjaft është mjaft, UEFA duhet të bëjë diçka. Gjyqtari ishte në favor të Realit”, ka thënë Al-Khelaifi.
