Pas takimeve të zhvilluara të zëvendësndihmës Sekretarit Amerikan të Shtetit, Hoyt Yee me liderët politikë, është risjellë në tavolinë paketa e propozuar pak javë më parë nga zëvendëspresidenti i PPE-së, David McAllister për t’i dhënë një zgjidhje përfundimtare krizës politike.
Takimi i zyrtarit të lartë amerikan me kryeministrin Edi Rama, kreun e PD-së Lulzim Basha, presidentin e sapozgjedhur Ilir Meta, ka dhënë efektet e para pozitive për të rikthyer në bisedime palët politike.
Pas presionit të SHBA-së, kryeministri Edi Rama dhe kreu i demokratëve Basha kanë vënë në lëvizje njerëzit e tyre për të arritur në një marrëveshje të mundshme për 48 orët e ardhshme.
Sipas burimeve për “Tirana Today”, Partia Demokratike është treguar e gatshme të pranojë paketën “McAllister” për zgjidhjen e krizës, nisur edhe nga situata e vështirë ku gjendet në raport me faktorin ndërkombëtar.
Përgjatë krizës 3 mujore kryeministri Edi Rama dhe kreu i PD-së Basha janë takuar dy herë “kokë ë kokë” në prani të Presidentit të Republikës, Bujar Nishani, por pa mundur të arrijnë në një marrëveshje. Ndërsa tani po shikohet të gjendet një rrugëzgjidhje që mund të sjellë në një mendje të dyja palët, e cila lidhet me atë që propozoi pak javë më parë, zëvendëspresidenti i PPE-së, David McAllister.
Paketa “McAllister” parashikon:
- Shtyrjen e zgjedhjeve më 16 korrik
- Zëvendësimi i katër ministrave të kabinetit Rama me persona teknikë të zgjedhur nga kryeministri Rama dhe të aprovuar nga opozita
- Zgjedhja me konsensus e Avokatit të Popullit, kalimin e kryetarit të KQZ-së opozitës, por jo shumicën në KQZ
- Dakordësimi për një tryezë të rrumbullakët të OSBE-së, pjesëmarrje te OJQ-ve në gjithë këtë proces.
Opozita mund heqë dorë nga disa prej kërkesave të saj:
- Praninë e katër ministrave teknikë të përcaktuar nga Rama
- Në qeverinë teknike kryeministri të propozohet nga Partia Socialiste, Edi Rama apo mazhoranca
- Përcaktimi i datës së zgjedhjeve të kushtëzohet në bazë të garantimit të votës së qytetarëve shqiptarë
- Votimi biometrik, elektronik dhe numërimi elektronik i votave të shqiptarëve.
(TIRANA TODAY)
