Rusia mund të pushtojë Ukrainën “në çdo kohë”, dhe qytetarët amerikanë duhet të largohen menjëherë. Ky paralajmërim vjen nga SHBA-ja. Një pushtim mund të fillojë me bombardime ajrore, që do të vështirësojnë nisjet dhe do të rrezikojnë civilët, tha Shtëpia e Bardhë të premten.
Moska ka mohuar në mënyrë të përsëritur çdo plan për të pushtuar Ukrainën, pavarësisht se grumbullon më shumë se 100.000 trupa pranë kufirit. Deklarata e SHBA-së bëri që vendet në mbarë botën të lëshojnë paralajmërime të reja për shtetasit në Ukrainë.
Mbretëria e Bashkuar, Australia, Kanadaja dhe Holanda, janë ndër ato që u bëjnë thirrje qytetarëve që të largohen sa më shpejt të jetë e mundur.
Megjithatë, përpjekjet për të ulur tensionet përmes diplomacisë do të vazhdojnë të shtunën, me presidentin amerikan Joe Biden dhe presidentin e Francës Emmanuel Macron që do të flasin me Vladimir Putinin e Rusisë me telefon. Këshilltari i Sigurisë Kombëtare i SHBA-së, Jake Sullivan tha se forcat ruse tani janë “në një pozicion për të qenë në gjendje të ndërmarrin një aksion të madh ushtarak”, në vërejtjet që shihen si një përshkallëzim i qartë në urgjencën e paralajmërimeve nga zyrtarët amerikanë.
“Ne padyshim nuk mund të parashikojmë të ardhmen, nuk e dimë saktësisht se çfarë do të ndodhë, por rreziku tani është mjaft i lartë dhe kërcënimi tani është mjaft i menjëhershëm sa që [largimi] të jetë i kujdesshëm”, tha ai.
Sullivan shtoi se administrata nuk e dinte nëse presidenti rus Vladimir Putin kishte marrë një vendim përfundimtar për të pushtuar, por tha se Kremlini po kërkonte një pretekst për të justifikuar veprimet ushtarake, të cilat ai tha se mund të fillonin me bombardime intensive ajrore.
Komentet e tij erdhën pasi zyrtarët amerikanë paralajmëruan për një grumbullim të mëtejshëm të trupave ruse në kufijtë e Ukrainës, gjatë javës së kaluar, dhe planifikonin stërvitje ushtarake ruse në Detin e Zi në ditët në vijim.
Më herët, Sekretari amerikan i Shtetit, Antony Blinken, tha se rritja e forcave ruse në kufi ishte “shenja shumë shqetësuese të përshkallëzimit rus”.
“Ne jemi në një dritare kur një pushtim mund të fillojë në çdo kohë, dhe për të qenë të qartë, kjo përfshin edhe Lojërat Olimpike [të cilat përfundojnë më 20 shkurt],” tha zoti Blinken.
Presidenti Biden ka thënë se ai nuk do të dërgojë trupa për të shpëtuar asnjë qytetar të mbetur të bllokuar, në rast të aksionit rus.
Burimi i lajmit: BBC. Përshtatur nga Tirana Today
